Nassiam hasoman halak Simalungun, bani tahun 2004 ondi tubuh do sada uhur na sihol tumang mardingat tanoh Simalungun. Sihol sisonon on sedo siholan hubani sasahalak jolma tapi hasiholan hubani huta sandiri pakon hubani suku sandiri. Bani tanoh panrattouan on sipata siholan ma diri mulak huhuta, mangidah juma, mangidah lombang bagas ai, maridi nian i bah, mangahapkon borgoh ni alogou i huta, mangan dayok binatur, patarni mamanggang, patar ni use adong pesta ase boi mangan naihasumba.

Mungkin sihol si sonon on ongga do tubuh i bagas diri nassiam hasoman na magodang i panrattouan. Halani sada cita-cita ase dapot hagoluhan undear humbani ihuta, buei do halak laho manrattou hu kota, baik ai sihol marsikolah bani parsikolahan na jenges, pakon adong ma homa ai sihol dapotan horja na jenges. Aha pe na mambahen ham adong i panrattouan sonari tottu adong do sihol nakkin ai tubuh ibagas dirimu.

Naha bahenon, sihol diri mardingat huta tapi seng boi mulak, tapi sebalikni ilobei monitor on di diri lalap. Nitorihan ma kabar pasal Simalungun i internet hape sada pe lang adong informasi tentang Simalungun. Ongga ma nitorih hata 'Simalungun' i mesin pencari www.google.com adong ma sada na dapot aima website pribadi ni halak Simalungun ai pe ibahen marhiteihonni webstie gratisan do hassa. Aipe domma itortori galot gatni(dokah ma lang i-update).

Adong do homa hasiholan sonon, sihol marlajar atap pe mambasa pasal budaya ni Simalungun, baik ai pasal paradaton atap pe sejarah. Kabar burukni, seng adong referensi sisonon on. Porini adong pe mungkin ibotoh nassiam, susah tumang dapot apalagi nassiam tading i tanoh panrattouan. Balikni ai homa, buei do hasoman Simalungun i huta na mambotoh tentang hasimalungunon, baik ai budaya, bahasa, aksara, musik, sipanganon, pakon nalegan tentang Simalungun, tapi lang ongga iajarkon hubani hasoman na legan. Ongga do nian tapi sebatas i huta ai dassa. Atap pe sahalak bapa Simalungun na manggoluh i panrattouan sihol patugahkon aha do Simalungun, song adong patuduhon na bei halani otik ni publikasi pasal hasimalungunon.

Halani au sandiri horja bani dunia IT do, pakon aha pelang na tarbahen ahu mandapotkon informasi Simalungun. Jadi tubuh ma ibagas uhurhu, mase lang i bahen hita sada media na boi mambere informasi tentang Simalungun? Sukkun-sukkun on ma na torus mangganggu au sampai lang boi modom anggo lape adong na hubahen untuk Simalungun. Domma puluhan proyek pembangunan website huhorjahon bani halak sadokah on, tapi website pribadiku sandiri lupa au mambahen; tapi website tentang Simalungun lape ongga hubahen. Mungkin buei do homa hasoman na songon au ai siholna bani Simalungun, tapi seng ibotoh hunja mulai.

Mulai sadari ni ai torus ma adong bani dirikku, "ai siparutang do ahu bani Simalungun". Eak, ai siparutang do ahu bani Simalungun, halani ai maningon do bahenonku aha na boi hubahen bani Simalungun.

Nassiam hasoman,
anggo nassiam tarmasuk do homa golongan ai siparutang do ahu bani Simalungun, ra do nassiam mambahen atap pe mangkorjahon otik gelah untuk Simalungun? Boi do ibuat ham pala sajam atau dua jam ibagas sabulan humbani waktumu untuk manuliskon aha na ibotoh ham tentang Simalungun? anggo boi do, daftarkon ham ma dirimu bani website Simalungun.Net on, ase ibahen admin sada blogs bamu untuk tempat manulis pasal Simalungun.

AHA do na mambahen sada partai politik na baru minttor itandai halak/terkenal? AHA do mambahen sada tokoh politik, atap pe sada calon figur pemimpin mintor boi podas terkenal itandai masyarakat? KUNCI ni ai ganupan aima bue ni halak na mambaritahon pasal si, pasal partai ni; Buei ni media, baik ai media elektronik atap pe media cetak, na manulis pasal barita tentang partai baru ai pakonfigur pemimpin ni. Sehingga minttor podas itandai halak.

On sada cara atap pe trik do on tene. Janah on ma na ipake hita bani website on. Anggo sihol do hita Simalungun itandai halak, riap ma hita ganupan mampublikasihon Simalungun hubani publik. Salah sada cara mampublikasihon aima dengan cara manuliskonsi pakon patugahkon bnai halak na lape mambotoh. Dengan cara aima web simalungun.net on hadir, untuk mampublikasihon hasimalungunon.

Jaya ma Simalungun. Horas.